Përgjegjësi DPAP, theksoi se mbi 80% e stafit të mësuesve janë vaksinuar, ndërsa theksoi se Ministria e Arsimit ka disa skenarë në varësi të pandemisë në vendin tonë.
“Ky është viti i dytë mësimor që përballemi me pandeminë. Mësuesit janë të përgatitur për mësimin online dhe një nga arsye e shtyrjes së datës për fillimin e procesit mësimor, ishte kërkesa e prindërve. Kërkesa më e madhe është që mësimi të jetë fizikisht në auditor, dihet është edhe më mirë. Mësimdhënia u vendos në të mirë të nxënësve. Jam i kënaqur me vaksinimin e mësuesve jemi në një situatë shumë të mirë. Jemi në një situata që më 27 shtator fëmijëve t’iu garantojmë një mësimdhënie të sigurt”, tha fillimisht Çifliku.
“Ngarkesa e mësuesve nuk është përtej normës pasi Ministria e Arsimit ka vendosur në dispozicion fonde të caktuar për orët shtesë që mund të zhvillojë. Ne kemi staf të devotshëm mësuesish që punojnë edhe në situata të vështira sic është kjo e pandemisë. Ne kemi disa skenarë dhe do të veprojmë në varësi të situatës së pandemisë në Shqipëri. Mësimi plotësues u vendos për të mirën e nxënësve. Lëndët që kanë problematika dhe kërkojnë orë shtesë, janë: Gjuha shqipe, matematika, gjuha e huaj, biologjia, fizika dhe kimia” vijoi Çifliku
Vaksinimi i mësuesve? “Nga të dhënat jo zyrtare: Ne na rezulton mbi 80 % e stafeve tona janë vaksinuar, menjëherë pasi Komiteti Teknik ka urdhëruar të vaksinohen me detyrim të gjithë mësuesit dhe nxënësit. Komiteti teknik do na sjellë javën e ardhshme numrin e saktë të mësuesve që do të vaksinohen”, përfundoi Çifliku.
