Pas dy javësh në luftë me flakët janë shuar vatrat e zjarrit në Karaburun. Lajmin e bën të ditur ministri i Mbrojtjes Niko Peleshi. Në një postim në llogarinë e tij në Facebook, Peleshi ka publikuar edhe pamje të filmuara nga helikopteri që tregojnë se në gadishull nuk ka vatra aktive zjarri.
Ministri ka falenderuar zjarrikësit, trupat e Forcave të Armatosura e të gjithë personat e përfshirë në operacionet për shuarjen e flakëve.
NIKO PELESHI NË FACEBOOK
“Më në fund pas 2 javësh mundi dhe sakrificash, nuk ka më vatra zjarri në Karaburun. Qindra orë betejash, qindra trupa të Forcave të Armatosura e forcave zjarrfikëse, specialistë të zonave të mbrojtura dhe emergjencave civile kanë punuar pa u lodhur për të shpëtuar Parkun Kombëtar të Llogarasë. Kjo stinë e nxehtë s’ka mbaruar por sot, në këtë moment frymëmarrjeje dua t’i falenderoj të gjithë ata që dhanë gjithçka në këto ditë të vështira. Të gjithë po bëjmë detyrën por disa heronj shkojnë përtej detyrës. Prefekti Flamur Mamaj, komandantët që drejtuan operacionet e vështira Gëzimi, Pëllumbi, Idrizi, Arbeni, punonjësit e Agjencisë së Mbrojtjes Civile, punëtorët e palodhur të zonave të mbrojtura si Nexhipi, Ganiu e te tjerët që nuk i takova dot sepse ishin gjithë kohën në frontin e betejës me zjarret, pilotët Julian, Agimi, Ervini dhe Agroni, janë shqiptarë të rrallë që meritojnë respekt dhe mirënjohje.
Nuk mund ta le mënjanë çdo ushtar të thjeshtë që nuk ia mësova dot emrin por i pashë veprën.
Sfida vazhdon. Ne jemi të gatshëm në krah të komuniteteve lokale.” s.b/abcnews.al/
