45 objekte në zonën e Velipojës janë futur në listën e godinave që do të shemben nga IKMT në kuadër të operacionit “Bregdeti Ynë”. Raporotohet se 25 objekte ndodhen përgjatë vijës bregdetare ndërsa 20 të tjerë mbi pedonale.
Konkretisht në zonën përgjatë bregdetit pritet të shemben 18 njësi shërbimi një katëshe me konstruksion druri, 2 objekte 1-katëshe me konstruksion druri dhe 1 metalik, 1 kontejner me konstruksion druri dhe dy platforma të shtruara me pllaka guri. Në zonën mbi pedonale janë kryesisht objekte pa leje si dhe shtesa në godinat ekzistuese të ndërtuara pa leje.
Paralelisht me Velipojën aksioni i IKMT po vijon edhe në zonën e Ksamilit për t’u shtrirë më pas në të gjithë vijën bregdetare. Zv/ministri i Brendshëm Julian Hodaj ka deklaruar se ky operacion pritet të përfundojë brenda datës 30 qershor për të mos penguar sezonin turistik.
