Kryeministri turk, Binali Yildirim e ka përshkruar si “qesharake” rezolutën e parlamentit gjerman me të cilën vrasja masive e armenëve nga Perandoria Osmane, njihet si genocid.
Ai ka paralajmëruar gjithashtu se miratimi i kësaj rezolute do të dëmtonte marrëdhëniet bilaterale.
Ligjvënësit gjermanë pritet që nesër të përkrahin rezolutën simbolike rreth masakrimit të para një shekulli të gati 1.5 milionë armenëve nga forcat osmane turke.
Turqia e kundërshton fuqishëm idenë se këto vrasje jane genocid, duke thënë se numri i armenëve të vrarë është shumë më i vogël.
Vrasja dhe deportimi i rreth 1.5 milionë armenëve nga forcat osmane, nga shumë historianë dhe disa kombe konsiderohet genocid.
Komentet e Yildirimit të bëra sot pasojnë ato të presidentit turk, Rexhep Taip Erdogan të bëra në fillim të kësaj jave.
Erdogan ka thënë se miratimi i rezolutës do të “dëmtonte” lidhjet diplimatike, politike, tregtare dhe ushtarake në mes të Ankaras dhe Berlinit.
