Mesditën e kësaj të shtune, policia zbuloi një ngarkesë me mbi 100 kg kokaine që ishte fshehur në një kontejner me banane që ishte nisur nga Amerika Latine për llogari të kompanisë “Masabi Fruits” me seli në Tiranë.
Droga ishte fshehur në tavanin e kontejnerit e ndarë në 200 pako të mbështjella me natriban dhe me mbishkrime përcaktuese si dhe fotografinë e trafikantit famëkeq Pablo Escobar. Në pakot e kokainës ishte shkruar në spanjisht ‘El Mejor” (më e mira) dhe ‘Viejon’ (i moshuar), teksa kishte si imazh Pablo Escobar.
Mësohet se kontejneri ishte nisur ditën e djeshme nga porti Pireut në Greqi dhe kishte mbërritur paraditen e sotme në Durrës. Sipas burimeve nga policia e Durrësit, ka qenë skaneri i kontrollit që ka zbuluar ngarkesën e kokainës.
Ngarkesa iu nënshtrua skanerit, pasi u vlerësua si një kontejner me risk. Mësohet se, kontejneri ku u gjet droga është shkarkuar nga anija e kontejnerëve ”Dance”, anije me flamur portugez që vinte në Durrës pas ndalesës në portin grek të Pireut. Burime nga grupi hetimit thonë se rasti konkret është zbuluar falë bashkëpunimit nga partnerët e huaj.
Nëntë ditë më parë, më konkretisht më 1 prill, në Portin detar të Durrësit u zbulua dhe sekuestrua një tjetër sasi kokainë prej 49 kg, e cila gjithashtu u gjet e fshehur në një kontejner që transportonte banane nga Amerika Latine. Kjo është sasia e dytë më e madhe e kokainës që sekuestrohet në portin e Durrësit.
Në shkurt të 2018, policia sekuestroi plotë 613 kg kokainë dhe arrestoi tre persona, mes tyre edhe administratorin e kompanisë që kishte porositur ngarkesën me banane Arbri Cekaj. Por dhjetë ditë më parë, me datë 1 prill u arrestua edhe babai i tij, Selim Cekaj, pasi në ngarkesën me banane të porositura nga ai u gjetën 49 kg kokainë.
