Vijoi mes dyshimit dhe entuziazmit vaksinimi i mësuesve në kryeqytet me vaksinën “AstraZeneca”. Një pjesë jo e vogël e mësuesve pohojnë pasigurinë dhe frikën e tyre për pasojat e vaksinës “AstraZeneca”.
“Po frikë është, çka kemi dëgjuar ne televizor. Po është e vështirë, pashë dje ne televizor që i kishin pezulluar këto vaksinat “AstraZeneca” në Bashkimin Europian”, tha për News24 një mësues i liceut artistik “Jordan Misja”.
“Jemi të pasigurt, kemi ardhur për ta bërë vaksinën “AstraZeneca”, por ende të pasigurt jemi se nuk jemi 100% të sigurt. Edhe thashethemet kanë ndikuar. Mendoj se procesi i vaksinimit duhet të pezullohej si në vendet e tjera deri në momentin qe të kishte një përgjigje me të saktë ashtu si shtetet e tjera”, shprehet një tjetër mësuese e liceut “Jordan Misja”.
Disa mësues ishin paraqitur pranë qendrës së vaksinimit pranë gjimnazit “Ismail Qemali”, por refuzuan me shkrim ta merrnin vaksinën “AstraZeneca” duke firmosur formularin me gjithë arsyet e refuzimit.
“Jo, kam ardhur për të bërë vaksinën, kam ardhur këtu të paraqitem, vetë e kam kaluar Covid-19”, u shpreh katautori i njohur Kristi Popa, mësues pranë liceut artistik “Jordan Misja”.
Sakaq një pjesë e madhe e mësuesve vazhduan vaksinimin, duke mbajtur shpresa të mëdha tek shkenca, te tjerë treguan se vaksina është domosdoshmëri dhe të gjithë duhet ta pranojnë pa hezitim.“Do bëjmë atë që është më e mirë”.
“Deri sa po bëhet, besoj se ka siguri”.
“Nuk kam absolutisht frikë, të gjithë mësuesit duhet ta bëjnë, lajmet do bëjnë punën e tyre”.
“Tani kjo është shkencë, si ta hedhim shkencën poshtë”.
“Mençuria ime thotë se duhet bërë, megjithatë unë besoj shumë tek shkenca sesa tek politika”.
“Sapo u vaksinuam, jemi mirë, çdo gjë do shkojë në rregull”, ishin disa nga opinionet që News 24 u shkëputi arsimtarëve pranë gjimnazit “Ismail Qemali” e cila ishte kthyer edhe këtë të mërkurë në një qendër vaksinimi për disa shkolla përreth.
Ministrja e Shëndetësisë nëpërmjet një postimi njoftoi se 2664 mësues janë vaksinuar deri në datën 17 mars me dozën e parë duke siguruar kështu mbrojtjen ndaj COVID-19. News24 mësoi pranë Institutit te shëndetit Publik se procesi ka ecur mire, dhe se deri tani nuk ka pasur asnjë efekt anësor tek mësuesit qe kane marre dozën e pare të vaksinës.
