Angelina Jolie Pitt mund t’i shtojë rezymesë së saj mjaft impresionuese që tani, edhe angazhimin “pedagoge e ftuar”.
Aktorja dhe humanistja do t’i bashkohet një prej universiteteve më të njohur në Londër, London School of Economics si pedagoge e jashtme e Qendrës për Gratë, Paqen dhe Sigurinë gjatë vitit shkollor 2016-2017. Si pedagoge e ftuar, Jolie Pitt mund të mbajë leksione për studentët dhe të marrë pjesë në seminare me ekspertë dhe evente publike dhe të vazhdojë ndërkohë punën e saj, shkruhet në website-in e LSE-së. Ajo do të japë leksione në programin e Masterit Shkencor që përmban kurse si “Gratë, Paqja dhe Siguria”, “Gjinitë dhe Ushtria”, “Gjinitë dhe Të drejtat e njeriut”.
“Ndihem shumë e inkurajuar nga krijimi i këtij programi. Shpresoj që insitucione të tjera akademike ta ndjekin këtë shembull, duke qenë që është thelbësore që ne të zgjerojmë diskutimin sesi të avancojmë të drejtat e grave dhe t’i japim fund mosndëshkueshmërisë për krimet që, në mënyrë të shpërpjesshme, prekin gratë, si dhuna seksuale në konflikte. Mezi po pres të jap mësim dhe të mësoj nga studentët dhe gjithashtu të ndaj eksperiencat e mia të punës pranë qeverive dhe Kombeve të Bashkuara.”
Jolie Pitt, 40 vjeçe, prej kohësh ka qenë një mbrojtëse e fuqishme e të drejtave të grave, sidomos si e Dërguar Speciale për Kombet e Bashkuara dhe ka folur, edhe më pare, kundër dhunës seksuale dhe krimeve të luftës ndaj grave. Vitin e kaluar, ajo dhe Sekretari i Parë i Shtetit në Britani, William Hague hapën Qendrën për Gratë, Paqen dhe Sigurinë në LSE për të luftuar dhunën në zonat e konfliktit./class
