Pas gati katër vite e gjysmë prej nisjes së punimeve, ka përfunduar ndërtimi i gazsjellësit Trans Adriatic Pipeline (TAP).
Një nga investimet më të rëndësishme që përfshin edhe vendin tonë tashmë është gati të sjellë gaz natyror nga fusha gjigante e Shah Deniz II në Detin Kaspik, Azerbajxhan.
Gazsjellësi me gjatësi 878 km lidhet me Gazsjellësin Trans Anatolian (TANAP) në kufirin Turko-Grek në Kipoi, kalon Greqinë dhe Shqipërinë dhe Detin Adriatik, përpara se të dalë në breg në Italinë e Jugut.
Rrugëzimi i TAP mund të lehtësojë furnizimin me gaz në disa vende të Evropës Juglindore. Dalja e TAP në Itali ofron mundësi të shumta për transport të mëtejshëm të gazit Kaspik në tregjet më të gjera Evropiane.
Si pjesë kryesore e Korridorit Jugor të Gazit, TAP është strategjikisht dhe ekonomikisht i rëndësishëm për Evropën dhe thelbësor në sigurimin e qasjes së besueshme në një burim të ri të gazit natyror. TAP luan një rol të rëndësishëm në rritjen e sigurisë së energjisë në Evropë, diversifikimin e furnizimit, si dhe objektivat e dekarbonizimit.
Aksionet e TAP përbëhen nga BP (20%), SOCAR (20%), Snam (20%), Fluxys (19%), Enagás (16%) dhe Axpo (5%).
