Shtëpitë muze të shkrimtarëve të mëdhenj në gjithë botën synojnë të jenë një atraksion turistik, por të kthesh një shtëpi në muze duhet të ruash identitetin e saj siç ka qenë në kohën kur në të ka jetuar shkrimtari. Me shtëpinë e shkrimtarit më të shquar shqiptar me famë botërore duket se ka ndodhur e kundërta. Mesa duket Bashkia e Gjirokastrës dhe Ministria e Kulturës kanë arritur të bëjnë një shtëpi të bukur që shkëlqen nga jashtë e brenda por nuk e kanë sjellë atë në shtëpinë që jeton në kujtimet e fëmijërisë së Ismail Kadaresë. Kjo gjë kuptohej nga shprehja e fytyrës së tij gjatë vizitës që mbajti në shtëpinë e tij këtë fundjavë. Ai nuk preferoi të komentonte, por mediat raportuan për shfaqjen e pakënaqësisë në fytyrën e tij gjatë gjithë vizitës që mbajti i shoqëruar nga kryebashkiakja Zamira Rami.
Dukej sikur Kadareja nuk po njihte më shtëpinë e tij. Ajo çfarë ka parë Kadareja nga banesa e tij tre katëshe në lagjen “Palorto”, nuk i përngjante aspak strukturës dhe pamjes origjinale të godinës, ku ai u lind dhe u rrit.
Në rrjetet sociale shumë komente fajësojnë shkrimtarin për karakterin e tij idhnak, por në fakt në këtë rast ai ka plotësisht të drejtë…në fund të fundit synimi i të mbajturit të një shtëpie muze është synimi për të qenë sa më afër origjinalitetit të saj në kohën kur ka jetuar shkrimtari. Mjafton të përmendim këtu se në shtëpinë e lindjes së Sheksipirit mbahet çdo gjë po kaq e vjetër dhe kaq afër imagjinatës që mund të ketë çdo lexues i tij.
Duket qartë se në këtë shtëpi mungonin elementë identifikues duke nisur që nga shkallët që kanë qenë prej guri dhe tani i kanë bërë prej druri e duke nisur nga druri që është përdorur brenda që s’ka asnjë lidhje me atë që ishte përdorur dikur nga gjirokastritët për të ndërtuar shtëpitë e tyre, një dru i djegur që merrte një ngjyrë karakteristike të zezë. Shtëpia e tij u shkrumbua nga një zjarr i rastësishëm nëntorin e vitit 1999.
27.al sjell më poshtë fotot e shtëpisë së Kadaresë dhe të shtëpisë muze të Shekspirit për të kuptuar dallimin që ka restaurimi e mirëmbajtja e një shtëpie në formën e saj origjinale.
