Lidhur me plagosjen e djeshme në zonën e “Astirit” në Tiranë, policia ka shpallur në kërkim gjithsej tre persona, mes tyre edhe një vajzë.
Në kërkim është shpallur autori i dyshuar Aleksandër Mehmetaj, 20 vjeç. Mehmetaj është kërkim edhe nga Policia e Durrësit, pasi Gjykata ka vendosur masë sigurie “arrest në burg” për një tjetër ngjarje.
Dy të tjerët e shpallur në kërkim për plagosjen e mbrëmshme janë E.D, 22 vjeç dhe E.C, 19 vjeçe. Ata akuzohen për moskallëzim krimi, ndërsa 20-vjeçari akuzohet për tentativë vrasje.
Ngjarja ndodhi pasditen e së dielës, ku 20-vjeçari Mehmetaj ka qëlluar me armë zjarri 45 vjeçarin Spartak Beqiraj duke e plagosur në këmbë. Dyshohet se ngjarja ka ndodhur për shkak se 45-vjeçari i ka kërkuar të mos konsumojë lëndë narkotike në ambientet e pallatit ku banonin.
