Babai reagon pas ngacmimit seksual të vajzës së tij dhe policia shkon e ndalon për plagosje të rëndë me dashje.
Sipas policisë, është ndaluar qytetari me inicialet Xh. B., pasi sipas tyre, ka goditur me grushte një 43-vjeçar, me motivin se i ka ngacmuar seksualisht vajzën e tij të mitur 17 vjeç.
Policia thotë se ka vënë në pranga edhe autorin e ngacmimit, 43-vjeçari me inicialet N. Ç. Njoftimi i policisë së Lushnjes:
Specialistët për Hetimin e Krimeve në Komisariatin e Policisë Lushnjë arrestuan në flagrancë, për veprën penale “Plagosja e rëndë me dashje”, shtetasin:
Xh. B., 54 vjeç, banues në Lushnjë.
Arrestimi i këtij shtetasi u bë pasi ka goditur me grushte shtetasin N. Ç., 43 vjeç, banues në Lushnjë, me motivin se i ka ngacmuar seksualisht vajzën e tij të mitur 17 vjeçe.
Gjithashtu u bë ndalimi i shtetasit N. Ç., për veprat penale “Ngacmimi seksual”, “Plagosja e lehtë me dashje”, “Armëmbajtja pa leje” dhe “Mbajtja pa leje e armëve të ftohta”. Gjatë kontrollit personal këtij shtetasi iu gjet dhe sekuestrua një kapsollë detonatore e paplasur, fishekë arme gjahu dhe një mjet prerës (thikë).
Të dy shtetasit e arrestuar ndodhen në spitalin e Lushnjës, nën kujdesin e mjekëve.
Materialet i kaluan Prokurorisë pranë Gjykatës së Shkallës së Parë Fier, për veprime të mëtejshme procedurale.
