Shoqëria civile në Shqipëri nuk ka vdekur dhe as ndërgjegja qytetare për të ndihmuar më të dobëtin. Por në rastin e “Sokratit” të Rrugës Bardhyl në Tiranë, një i moshuar i pastrehë dhe i sëmurë, tregoi se dhe strukturat shtetërore funksionojnë.
Gazetari Ilir Kadia dy ditë më parë në një status në facebook publikoi rastin e të moshuarit të pastrehë duke shkruar; “Nuk është Sokrati i Mirush Kabashit, është “Sokrati” i rrugës “Bardhyl” që nuk e zgjat dorën për lëmoshë… Që mbahet më këmbë mos bjerë në tokë prej urisë në shtyllën ku njoftohen vdekjet! Këmbëzbathur si Sokrati i teatrit por nuk është aktor që luan jetën e tjetrit. Unë nuk ja kursej monedhën më vlerën e një shishe kos por jo çdo ditë shkoj më këmbë në shtëpinë time”.
Por direkt pasi ky status i Kadisë u shpërnda nga qytetarë të tjerë ka reaguar struktura e posaçme e ministrisë Mirëqënies Sociale, Drejtoria e Shërbimit Social që drejtohet nga Etleva Bisha, duke i siguruar të moshuarit strehë dhe mjekimin e nevojshëm.
Në një postim të saj vetëm një ditë më vonë Bisha shkruan: “Sot Shërbimit Social Shtetëror iu referua përmes medias sociale rasti i një të moshuari që jetonte në situatë rruge prej shumë kohësh. Punonjësit social arritën të gjejnë të moshuarin dhe ai u vendos në mënyrë të menjëhershme në njerën prej Shtëpive që menaxhohet nga SHSSH. Stafi dhe mjeku po përkujdesen për të. Urojmë të mos jetë e nevojshme për askënd, por në rast emergjence në situata të ngjashme mund t’i drejtoheni si shërbimit social të Bashkisë në territorin ku ndodhet personi që ka nevojë për mbështetje, ashtu edhe Shërbimit Social Shtetëror”, shkruan ajo.
Falenderimet për reagimin e shpejtë të Shërbimit social kanë pasuar gjatë ditës së sotme në mediat sociale. Vetë gazetari Kadia shkruan; “E mbani mend postimin tim të mbrëmshëm me njeriun e varfër në zgrip? Tani është në strehën që i nevojitej dhe po merr kujdes shëndetësor! E bëri pa llafe e bujë Etleva Bisha nisur vetëm nga postimi im! Ajo është Drejtore e Shërbimit Social të Shqipërisë dhe i meriton të gjitha lavdet! Do orë më parë unë nuk e njihja Etlevën, por tani them se e kam mike shumë të mirë! Se një e panjohur që të dëgjon dhimbjen është mikja më e mirë në fakt”. /27.al
