Publikohet zyrtarisht drafti për amnistinë fiskale dhe penale. Projektligji tashmë ka nisur të konsultohet me grupet e interesit dhe pritet të kaloj brenda pak javëve për diskutim në parlament .Në këtë projektligj janë saktësuar të gjithë zyrtarët që nuk mund të përfitojnë nga kjo nismë.
Nga amnistia përjashtohen edhe të afërmit e të zgjedhurve politikë apo nëpunësve të shtetit. Në nenin 6 të projektligjit specifikohet se përjashtohen nga amnistia Presidenti i Republikës, deputetët e Kuvendit, Kryeministri, Zëvendëskryeministri, ministrat e zëvendësministrat, gjyqtarë ,Kryetari i Kontrollit të Lartë të Shtetit, Prokurori i Përgjithshëm, Avokati i Popullit, anëtari i Komisionit Qendror të Zgjedhjeve, anëtari i Këshillit të Lartë Gjyqësor, anëtari i Këshillit të Lartë të Prokurorisë.
Po ashtu nga amnistia e kapitalit nuk mund të përfitojnë as zyrtarët e nivelit të lartë dhe të mesëm drejtues. Drejtori dhe Zëvendësdrejtori i Policisë së Shtetit, drejtorët e drejtorive në Drejtorinë e Përgjithshme të Policisë së Shtetit, drejtorët e drejtorive vendore të Policisë së Shtetit.Edhe drejtues të tatimeve ,doganave, të Bankës së Shqipërisë Anëtari i institucionit të rivlerësimit (Komisioni i Pavarur i Kualifikimit, Kolegji i Posaçëm i Apelimit dhe komisionerët publikë etj.
I gjithë procesi parashikohet të monitorohet nga Njësia Speciale për mbikëqyrjen e deklarimit vullnetar të pasurive në varësi të drejtpërdrejtë të Drejtorit të Përgjithshëm të Tatimeve.
Ndërkohë që tatimi për deklarimin vullnetar parashikohet 5 për qind të shumës nëse vetëdeklarimi realizohet në katër muajt e parë nga hyrja në fuqi e ligjit; 7 për qind të shumës nëse realizohet në katër muajt e dytë dhe 10 për qind të shumës totale të deklaruar për deklarime dhe pagesa të kryera në katër muajt e tretë.
Në procesin e amnistisë do të përfshihen pasuritë e paluajtshme si dhe pasuritë e luajtshme të regjistrueshme në regjistrat publikë, shumat në të holla, monedhë shqiptare apo monedhë e huaj, monedhë dixhitale, sende me vlerë apo gurë të çmuar, vepra arti, tituj ose instrumente të tjerë të tregjeve financiare./abcnews.al
