Kreu i shoqatës së Psikologëve Kosovë-Shqipëri, Ilir Havolli ka folur për ngjarjen që tronditi opinionin shqiptar ku një 26-vjeçar i dha fund jetës në Qendrën e Studentëve vetëm një ditë pas riatdhesimit nga Gjermania.
Në një intervistë në “ABC e mëngjesit”, Havolli sqaroi se 26-vjeçari nuk ishte i infektuar me koronavirus, ndërsa shtoi se duhet të kthehet vëmendja te trajtimi i shëndetit mendor.
“Është bërë kërkesë që ai të kthehet pranë familjes sepse kishte probleme të ndryshme shëndetësore. Nuk ishte i infektuar me COVID-19, çdo qytetar që kthehet, duhet të karantinohen për 14 ditë, por psikologët duhet të jenë të pranishëm në situata të tilla. Mësohet se ka pasur probleme me veshkat dhe vendimi i qeverisë ka qenë që të karantinohet për 14 ditë në qendrën shëndetësore. Sipas komunikimeve të fundit është mësuar se ka përjetuar stres dhe ankth dhe në një moment sipas familjarëve thuhet se ka qenë i dëshpëruar, pasi edhe në momentin e kthimit nuk ka mundur të takohet me të afërmit. Ky rast na kthen vëmendjen te rëndësia e shëndetit mendor dhe duhet që ti trajtojmë me kujdes. Por, ka persona që riatdhesohen dhe kanë probleme të ndryshme të shëndetit mendor që ndoshta nuk janë trajtuar me të kaluarën, ndaj është e domosdoshme që të trajtohen me kujdes. Këta individë kanë për të përjetuar ankth dhe stres. Situata të tilla janë të vështira për tu përballuar”, tha Havolli.
Më tej ai theksoi se personeli mjekësor larg familjes përjeton një ngarkesë t madhe psikologjike, është një përvojë shumë e hidhur. “Qeveria duhet të kthejë vëmendjen të mantel bardhët. Ka presione psikologjike, presione të pacientëve, përballen me sëmundje që edhe ndoshta nuk tregojnë pasoja”, u shpreh ai./abcnews.al
