Beteja me Covid-19 te “Shefqet Ndroqi”, mjeku Tanka: Piku i pandemisë ka kaluar

Arben Tanka, mjek pneumolog i Spitalit “Shefqet Ndroqi”, shprehet se parametrat e epidemisë së koronavirusit në Shqipëri duken të mira.
Tanka në një intervistë të dhënë ka thënë se nuk dihet periudha e saktë kur do të dalim nga kjo epidemi, por sipas tij po shkojmë drejt një dalje të ngadaltë e konstante.
“Ne kemi 10 ditë ku shifrat e shtrimeve janë konstante në dy spitalet. Numri i të shtruarve është rreth 40 persona, është një konstante e 10 ditëve të fundit. Mund të themi që situata është relativisht stabël. Parametrat e epidemisë për Shqipërinë duken goxha të mira. Shpresojmë që në ditët në vijmë që kjo kurbë që është e sheshtë të vazhdojë të ulët. Nuk dihet periudha e saktë kur do të dalim nga kjo epidemi, por siç duket po shkojmë drejt një dalje të ngadaltë, por konstante.
Në spitalin tonë 4 pacientë janë në gjendje të stabilizuar. Nuk kanë nevojë për frymëmarrje të asistuar. Ndërkohë pjesa tjetër, 4 prej tyre janë në reanimacion. Gjendja në reanimacion është e rëndë dhe disa prej tyre janë të intubuar, pra kanë nevojë për frymëmarrje mekanike”, është shprehur mjeku pneumolog Arben Tanka.