Një buzëqeshje e mistershme që ka mahnitur botën për shekuj. Piktura më e famshme e Leonardo Da Vinçit ka më në fund një histori të zbuluar nga shkencëtarët.
Drejtues i Komitetit Italian të Promovimit të Historisë dhe Trashëgimisë Kulturore, Silvano Vinceti, thotë se është i bindur që mjeshtri i madh përdori dy modele për pikturën e tij, një vajzë dhe një djalë. Argumentet që ai ofron mbështeten te verifikimet e bëra trupit të Lisa Gherardinit, që pretendohet të ketë qenë modelja e piktorit për këtë portret.
“Pas një pune kërkimore jashtëzakonisht të kujdesshme, në të cilën kemi kombinuar metodat historike me teknologjinë më të avancuar që ekziston, më në fund ne mund të zgjidhim një mister të hershëm, atë të identitetit të vërtetë të Mona Lizës. Realiteti është se, Leonardo përdori dy modele të ndryshme. E para ishte Lisa Gherardini, e njohur si Mona Lisa del Giocondo. Modeli i dytë ishte një djalë, Gian Giacomo Caprotti, që njihej edhe me emrin Salai. Falë rrezeve infra të kuqe zbuluam gjithashtu se, në shtresën e parë të bojës në telajo, Mona Lisa nuk shihet duke buzëqeshur, por është melankolike dhe e trishtuar”, tha Silvano Vinceti, ekspert arti.
“Mona Lisa” ndodhet sot në Muzeun e Luvrit në Paris.
