Banorët në Shkozë kanë 30 vite që marrin premtime dhe përsëri janë pa rrugë të asfaltuara. Mbi 300 familje në zonën e Shkozës detyrohen të përdorin çdo ditë rrugën tejet të ngushtë e me gropa ku nuk të zë syri një centimetër asfalt.
Por veç rrugës e gjithë lagja nuk ka kanalizime të ujërave të zeza, e aq më pak ndriçim e gjelbërim.
Një vit më parë investimi rrugor i bashkisë Tiranë u shtri deri në një pikë e mandej punimet u ndërprenë afër 300 metra larg familjeve që sot protestojnë.
Banorët thonë se situata nuk ka ndryshuar për mirë edhe pas ankesave të shumta dërguar bashkisë madje edhe portalit të bashkëqeverisjes.
