Historia trishtuese e vogëlushit shqiptar Alvin, i cili u dërgua në Siri nga nëna e tij në vitin 2014, kur ishte 6 vjeç vazhdon të jetë në qendër të vëmendjes së mediave dhe autoriteteve italiane.
Këshilli Rajonal i Lombardias në Itali ka dalë sot me një vendim unanim të rëndësishëm ku i kërkon autoriteteve të bëjnë të pamundurën për kthimin e djaloshit shqiptar, Alvin Berisha, pranë babait të tij.
Midis të tjerave Këshilli Rajonal i ka kërkuar qeverisë të shikojë mundësinë që Alvini i vogël të marrë nënshtetësinë italiane, pasi familja e tij është plotësisht e integruar në jetën sociale në Lombardi.
Kujtojmë që historia e 11 vjeçarit u hetua më së shumti nga “Le Iene”, një emision investigativ që transmetohet në Mediaset në Itali.
Sipas informacioneve, Alvin është i vetëm në një kamp me ish-terroristët.
“Alvin gjendet i vetëm në një tjetër luftë për tu suportuar. Insitucionet kanë për të detyrë të reagojnë, duke u përpjekur ta sjellin të voglin në Itali në familjen e tij.
Prioriteti i Rajonit të Lombardias është që të sjellë Alvinin në shtëpi, ku e presin shumë persona të cilët i duan të mirën”, shkruan Paolo Romeo, këshilltare e Forza Italia.
