Vëllai i aktores së madhe shqiptare Yllka Mujo, artisti Agim Mujo është ndarë nga jeta në moshën 63-vjeçare.
Mësohet se Mujo ka ndërruar jetë mengjesin e djeshëm në kryeqytetin e Italisë në Rome nga një atak kardiak.
“Me hidhërim të thellë ju njoftojmë se sot ndërroi jetë nga një atak kardiak Agim Mujo, vëllai i Artistes Yllka Mujo. Në moshë fare të re Agimi luajti në një sërë filmash, midis të cilëve në filmin “Malet në blerim mbuluar”. Ai mbaroi studimet për pikturë dhe u shqua për talentin e tij, duke u paraqitur në shumë ekspozita në Itali dhe Francë”, ka njoftuar ish-bashkëshorti i aktores Yllka Mujo, Gjergj Zaharia në Facebook.
Agim Mujo hyri në kinematografi me interpretimin në filmin shqiptar bashkë me motrën e tij Yllkën, “Malet me blerim mbuluar” ku Agimi luante rolin e Zenelit. Po kështu ka luajtur dhe në rolin e Ardianit tek filmi “Guximtarët”. Mujo jetonte prej vitit 1990 në Itali i larguar me hapjen e ambasadave.
