Mbrëmjen e kaluar, persona ende të paidentifikuar kanë qëlluar në drejtim të banesës së Juxhin Kullës, në Korçë, ku fatmirësisht nuk ka patur të dhëna për persona të lënduar.
Ndërkohë ai ka deklaruar para autoriteteve se në momentin që ka dëgjuar të shtënat, ka qenë duke dalë nga banesa dhe se makina, me të cilën kanë qenë autorët, është larguar me shpejtësi në drejtim të fshatit Barc.
Burime bëjnë me dije së gjatë dëshmisë, Kulla ka thënë gjithashtu që ai nuk ka problem me askënd duke shtuar se problemin e ka me policinë, prej nga ku edhe pretendon se është dhunuar disa vite më parë.
“Sapo dilja nga banesa në momentin që kam dëgjuar të shtënat. Dëgjova një automjet që u largua me shpejtësi dhe xhirim në drejtim të fshatit Barc. Nuk pashë asgjë tjetër. Nuk kam probleme me askënd. Problemet e vetme që kam janë me policinë prej ditës që unë jam dhunuar prej tyre. Është qëlluar disa herë drejt katit të dytë të banesës. Nuk kam konflikt me asnjë person. Këtë e them me siguri”, ka thënë Juxhin Kulla.
Ndërkohë policia e Korçës ende nuk ka të shoqëruar apo identifikuar rreth ngjarjes.
Juxhin Kulla rezulton se ka qenë arrestuar më parë për shpërndarje të lëndëve narkotike.
Tre vjet më parë Juxhin Kulla akuzoi publikisht shefin e Seksionit Kundër Narkotikëve në Korçë që e ka dhunuar fizikisht.
/syri.net/
