Interpol Tirana ka ekstraduar nga Gjermania një 56-vjeçar shqiptar të dënuar me 25 vite burg për një vrasje në vitin 1998.
Bëhet fjalë për shtetasin shqiptar Byniamin Hajro, i cili u shpall në kërkim ndërkombëtar pasi Gjykata e Apelit Vlorë në vitin 2017 e ka dënuar me 25 vjet burg.
Kujtojmë që më 3 qershor 1997 në Berat dy të rinj janë marrë peng nën kërcënimin e armëve. Ata janë mbajtur një natë duke u keqtrajtuar në një garazh dhe të nesërmen, në mes të Beratit, trupat e tyre janë lyer me benzinë dhe u është vënë flaka teksa viktimat ishin lidhur.
Viktima të krimit makabër ishin Arjan Avdullai, 18 vjeç dhe Eduart Pema, 25 vjeç. Hetimet nisën më 22.03.1998, ndërsa në prill 2012, gjykata vendosi të rihapë hetimet pas dëshmisë tronditëse të vëllait të një prej viktimave.
Gjykata e Apelit Vlorë në vitin 2017 ka deklaruar fajtor për këtë ngjarje shtetasin Byniamin Hajro duke e dënuar me 25 vite burgim.
