Voskopoja parë me sytë e nxënësve të Liceut Artistik “Jordan Misja” sollën për publikun ekspozitën “Voskopoja në letër”, e cila qëndroi e hapur për pesë ditë, nga data 15 deri sot më 20 prill, në mjediset e Muzeut Historik Kombëtar.
Tre pedagogët Alketa Alikaj, Ahilino Palushi dhe Florian Haxhihyseni, së bashku me 30 nxënës të viteve të dyta dhe të treta të Liceut Artistik, nisën një udhëtim drejt Voskopojës, udhëtim i cili pas tri ditëve punë krijuese në terrenin e pasur me objekte kulti, që datojnë prej Mesjetës, solli një ekspozitë me 20 fotografi të realizuara në bardhezi dhe 42 piktura në teknikën miksmedia.
“Zgjodhëm Voskopojën pasi i përfshin brenda edhe turizmin, edhe trashëgiminë kulturore, por edhe historinë e artit. Është tamam periudha kur nxënësit njihen me historinë e artit në shkollë dhe ky udhëtim ishte i mirë për t’u njohur nga afër dhe për ta parë me syrin e tyre” -shprehet pedagogu Ahilino Palushi.
