Prokuroria e Krimeve të Rënda dhe Policia e Shtetit kanë përgënjeshtruar disa reagime të mediave lidhur me grabitjen spektakolare të Rinasit në fillim të këtij muaji.
Në një reagim të Prokurorisë thuhet se këto lajme janë të pavërteta dhe të pasakta.
Gjithashtu u bën thirrje qytetarëve të telefonojnë në 112 për të dhënë informacion, duke ju garantuar anonimatin.
Njoftimi i plotë:
Reagim i Prokurorisë së Krimeve të Rënda dhe Policisë së Shtetit
Lidhur me disa publikime në media ditën e sotme, për hetimet mbi grabitjen e datës 9 prill 2019 në Rinas, grupi i posaçëm hetimor deklaron se këto lajme janë të pavërteta dhe të pasakta.
Duke përfituar nga ky komunikim me mediat dhe publikun, gatantojmë qytetarët se Policia e Shtetit, Prokuroria dhe agjenci të tjera ligj zbatuese mbeten shumë të angazhuara për zbardhjen sa më të shpejtë të rrethanave të grabitjes, zbulimit të autorëve dhe përballjen e tyre me drejtësinë.
Çdo qytetar që ka informacion që beson se ndihmon hetimin, mund të telefonojë falas në numrin 112, duke ju garantuar anonimatin.
