Një tmerr i vërtetë ka qenë mëngjesi i së hënës për familjen Ndoj në Pukë.
Zjarri ka rënë në banesën e kësaj shtëpie në fshatin Breg të Pukës. Për pasojë, prindërit Petrit Ndoj, 40 vjeç dhe Dava Ndoj, 35 vjeçe humbën jetën në mes të flakëve në katin e dytë të banesës, por deshi Zoti dhe katër fëmijët e tyre arritën të hidheshin nga ballkoni dhe janë gjallë.
Fëmijët kanë disa dëmtime të lehta, por gjithsesi gjendja e tyre nuk u rrezikon jetën.
Po ashtu, gjyshërit 82-vjeçarë, gjyshja e paralizuar, është gjallë falë ndihmës që i kanë dhënë të vegjlit, më i madhi prej të cilëve vetëm 12 vjeç.
Policia dhe zjarrfikësit prej mëse dy orësh kanë punuar për të shuar flakët dhe gjetur trupat e prindërve në dhomën e gjumit.
Nuk dihen rrethanat e shpërthimit të zjarrit në shtëpinë dykatëshe në lagjen Va Shënkoll. Ka qënë gjyshi Pal Ndue Gjoni, që flinte në katin e dytë, që e ka konstatuar zjarrin dhe ka vënë alarmin në shtëpi.
Ai vetë tregon: “Dëgjova tullat që kërcisnin dhe më doli gjumi. Jam zgjuar shpejt, kisha hallin e fëmijëve. Thirra djalin që të merrte gruan time, që e kam të paralizuar. Kur e thirra djalin, nuk m’u përgjigj. U gëzova, kur pashë fëmijët që kishin dalë në oborr. Ajo që më ndodhi mua, mos t’i ndodhtë njeriu!” – tha ai.
