Ashtu sikundër është denoncuar edhe herë të tjera nga banorët e zonës së Liqenit të Thatë, kjo lagje ende vijon të duket njëlloj si para disa kohësh.
Ishte pikërisht ky liqen që e diferenconte “Liqenin e Thatë” nga zonat e tjera të Tiranës, por tanimë ky liqen është kthyer në një pellg për bretkosa.
Qytetarët e kësaj zone ankohen për aromën e keqe që mban anë rrugës që pas tharjes së liqenit ndërsa presin me padurim që të realizohet projekti që u është premtuar nga Bashkia e Tiranës.
Bashkia ka bërë me dije për mediat se tharja e liqenit është bërë me qëllim rehabilitimin e zonës, pasi ishte gati e pamundur të punohej në atë sasi uji. Në fakt kjo arsye është ende shumë e dyshuar pasi tharja e liqenit filloi fiks në kohën kur në anën tjetër të rrugës filluan punimet për ndërtimin e një kompleksi pallatesh. Uji i liqenit kalonte nga ana tjetër e rrugës duke krijuar pellgje të mëdha uji në zonën e ndërtimeve, gjë që pengonte kompaninë ndërtuese për vijimin e punimeve.
Mesa duket punimet për rehabilitimin e kësaj zone do vijojnë paralelisht me ndërtimin e kompleksit në anë, edhe pse duket qartë nga që ata mund të përfundojnë shumë më shpejt.
Bashkia e Tiranës ka premtuar që pas “rehabilitimit të zonës”, uji në liqen do të rikthehet në nivelin e dikurshëm. Deri atëherë urojmë që tharja e liqenit të mos ndikojë në shëndetin e asaj bote të vogël nënujore që gëzonin për peshkim dhe soditje banorët e kësaj zone.
