Identifikohet dhe shpallet në kërkim autori i hedhjes së kapsollës gjatë protestës së djeshme para Kuvendit, që i shkaktoi dëmtimin e gishtave të dorës efektives së policisë Ina Nuka.
Burime nga prokuroria e Tiranës që po merret me hetimin e akteve të dhunës në protestë bëjnë me dije se autori është identifikuar pas kqyrjes së pamjeve filmike.
Bëhet fjalë për një 18 vjeçar, ndaj të cilit gjykata e Tiranës ka caktuar masën e sigurisë “arrest me burg” pas kërkesës së organit të akuzës.
“Mendohet se ka edhe persona të tjerë të përfshirë në ngjarje.Mund të rritet numri i persona të akuzuar dhe të arrestuar.Pritet që që ata të dalin para gjykatës për masën e sigurisë. Ndaj tyre rëndojnë pesë akuza. Që nga dita e parë e protestës, sot jemi në ditën e 20, janë proceduar në gjendje të lirë për akuza të ngjashme rreth 60 persona. Prokuroria po vijon punën për kqyrjen e pamjeve filmike. Në hetim janë dhe mjetet e përdorura në protestë, kapsollat, ku ekspertët kanë verifikuar se kanë pasur sasi të lartë baruti. Po hetohet si janë siguruar këto kapsolla”, raportoi gazetarja Keti Banushi.
Efektivja Nuka pritet të transportohet drejt Stambollit
Efektivja Ina Nuka pritet të transportohet nga momenti në moment drejt Stambollit ku pritet të marrë dhe mjekimin e specializuar pas dëmtimit që pësoi kur u godit me kapsollë gjatë protestës së 22 nëntorit para parlamentit.
Mjekët i thanë gazetares së Ora News, Xhensila Demollai se policja ka humbur dy gishta, një gisht i tretë është prerë deri tek mollëza ndërsa një gisht tjetër ka pak dëmtime.
Të shumtë ishin familjarët që sot i gjendeshin pranë në Spitalin e Traumës në Tiranë dhe vijojnë të jenë të shokuar mbi atë që ndodhi para parlamentit.
Mësohet se Spitali i Traumës ka përgatitur të gjithë dokumentacionin dhe pritet vetëm sinjali nga pala turke dhe vajza të udhëtojë drejt Stambollit./Ora News
