Presidenti amerikan, Barack Obama, ka akuzuar presidentin e Rusisë, Vladimir Putin, për ngadalësimin e progresit në reduktimin e armatimit atomik, pasi është fokusuar në shtimin e forcës ushtarake ruse.
“Do të parapëlqeja uljen e mëtejshme të arsenalit tonë bërthamor”, tha Barack Obama në një konferencë për shtyp në Uashington, pas përfundimit të Samitit të Sigurisë Atomike, që zgjati dy ditë.
Administrata Obama i është drejtuar Rusisë me qasjen e mundshme të fazës së re në reduktimin e armatimit në vitin 2010, pasi Rusia dhe Shtetet e Bashkuara patën nënshkruar Marrëveshjen Strategjike të Reduktimit të Armatimit numër 2, e njohur me shkurtesën START 2.
Por, nuk ka pasur negociata të mëtejshme dhe Obama tha se kjo ka ndodhur “për shkak të vizitonit që Putini ka zhvilluar, të theksimit të forcës ushtarake ndaj zhvillimit”.
Putin, i cili e ka bojkotuar samitin në Uashington ku merrnin pjesë dhjetëra liderë të tjerë botërorë, tha në qershor se Rusia do t’i shtoj edhe më se 40 raketa balistike interkontinentale në arsenalin e saj bërthamor, për ta modernizuar programin e saj dhe për tu marrë me sistemet antiraketore mbrojtëse të NATO-s afër kufirit të Rusisë.
Obama tha se mundësia e progresit të ardhshëm për reduktimin e armatimit me Rusinë mbetet, derisa të dy vendet vazhdojnë ta respektojnë marrëveshjen START.
Por, ai theksoi se reduktimi ka pak gjasë që të ndodhë gjatë 10 muajve të ardhshëm sa ai është president amerikan.
