Drejtori i CIA-s, John Brennan, ka vizituar Moskën në një vizitë sekrete disa ditë para se Putin të njoftonte tërheqjen e trupave nga Siria.
Ka qenë zv/ministri i Jashtëm rus Oleg Syromolotov që e ka dhënë njoftimin.
Sipas tij vizita nuk kishte të bënte me vendimin për t’u tërhequr nga Siria.
“Nuk është më sekret që Brennan ishte në Moskë”, tha Syromolotov i pyetur nga agjencia e lajmeve Interfax.
“Ai u takua me kreun e FSS , ish-KGB, por nuk takoi ministrin e Jashtëm”, tha Syromolotov.
Zv/ministri i Jashtëm rus iu shmang pyetjes nëse drejtori i CIA-s kishte takuar Putinin.
Ai nuk mohoi ose pohoi diçka të tillë.
As amerikanët nuk kanë dhënë një shpjegim përse Brennan vizitoi Moskën dhe çfarë mund të jetë biseduar atje.
Por sipas ekspertëve vizita e tij ka shumë të bëjë me tërheqjen ruse nga Siria.
Sipas tyre, kjo tërheqje ka qenë e dakordësuar mes SHBA dhe Rusisë.
