Çmimi i biletës së udhëtimit në linjën e re hekurudhore Tiranë-Durrës do të jetë 1-1.2 euro.
Gjithçka u bë me dije nga zv. ministri i Infrastrukturës dhe Energjisë, Artan Shkreli gjatë diskutimit të projektligjit mbi grantin 35.4 milionë euro të Fondit të Investimeve të BE për financimin e rehabilitimit të linjës ekzistuese dhe degëzimit të ri hekurudhor në Rinas.
“Ndodh që bileta, pavarësisht se nuk është përcaktuar, është shumë e saktë në përgatitjen e fizibilitetit të lëvizjes së njerëzve, do luhatet midis 1 euro dhe 1.2 pak a shumë. Pse nuk është përcaktuar kaq saktë nga ne është fakti që i përgjigjet dhe pyetjes tjetër që operatorët do të jenë të hapur, pra do të jenë operatorë publikë, mund të jenë edhe operatorë privatë, sikurse ekziston edhe mundësia e kombinimit të operatorëve”, tha Shkreli.
Kosto totale e projektit kap vlerën e 90 milionë euro, nga të cilat 16 milion euro do të financohen nga buxheti i shtetit, 36 milionë euro hua e Bankës Botërore dhe 35.4 milionë euro granti i BE-së. Afati i përfundimit të punimeve është data 31 dhjetor 2020, por sipas Shkrelit ai mund të shkelet vetëm për linjën e re drejt Rinasit.
Referuar projektit, lokomotiva e re do të jetë me diesel, ndërkohë që për lokomotivën elektrike kërkohen edhe 10-12 milionë euro shtesë. Ndërkohë që, sa i takon operimit të linjës, ende nuk është vendosur forma që do të zbatohet, por zv.ministri i Infrastrukturës nuk përjashtoi mundësinë e një bashkëpunimi me kompanitë private.
