Partia Demokratike vijon të ftojë qytetarët të marrin pjesë në protestën e 7 korrikut. Përmes pensionistit, Pëllumb Zade, 79 vjeç, selia blu u dërgon një mesazh të gjithë shqiptarëve që ka shumë arsye për të protestuar më 7 korrik. PD liston rrogat e ulëta, pensionet, çmimet e larta, braktisjen e qeverisë dhe së fundmi shpopullimin. “Kur një prej nesh është në rrezik, Shqipëria është në rrezik.”- u shpreh pensionisti, i cili zbuloi se pensioni i tij është i pamjaftueshëm.
Deklarata:
Unë jam Pëllumb Zade, 79 vjeç, pensionist.
Jam një prej ‘të mbijetuarve’ të Unazës së Re. Jam pak më me fat se të tjerët, sepse kam humbur vetëm gjysmën e shtëpisë.
Për veten mund të them se jam një shqiptar me çerek pensioni dhe gjysmë shtëpie.
Ka një mijë arsye për të dalë në protestën e 7 korrikut.
Janë rrogat e ulëta, pensionet e mjera, çmimet pa tavan dhe, mbi të gjitha, shpërfillja e qeverisë.
Arsyeja madhore është shpopullimi. Kam një pyetje për të gjithë ata që bëjnë sikur nuk e shohin zbrazjen e atdheut. Kush do të paguajë për pensionin tim sot dhe për pensionin tënd nesër, nëse vendi zbrazet nga forca punëtore dhe arsenali njerëzor!?
Një pyetje e kam edhe për ata që thonë se kanabisi nuk na bën gjë, se ne nuk e përdorim.
Po kur të vejë te fëmijët? Po nuk qenë fëmijët e mi do të jenë të tutë.
Një pyetje kam për ndërkombëtarët: Si e përkrahni një qeveri të tillë në vendin tim? A do ta lejonit një qeveri të ngjashme në vendin tuaj?
Jam Pëllumb Zade. Jetoj vetë i pestë me një pension 18 mijë lekësh.
Kur një prej nesh është në rrezik, Shqipëria është në rrezik.
