Nga Erblina Mile
Rreth 23 % e familjeve në Shqipëri marrin borxhe për të përballuar jetesën. Banka e Shqipërisë ka realizuar një vrojtim për 6 mujorin e parë të këtij viti ku ka rezultuar se pandemia ka përkeqësuar gjendjen financiare të familjeve shqiptare me të ardhura më të ulëta.
Konkretisht, shpërndarja e huamarrësve sipas të ardhurave rezulton më e përqendruar në nivelin “17-50 mijë lekë” ku janë 51% e huamarrësve dhe në nivelin “50-100 mijë lekë” 32% e huamarrësve. Shqetësues mbetet fakti se ka pasur një rritje të ndjeshme të numrit të familjeve që marrin borxhe në mënyrë informale krahasuar me 6-mujorin e kaluar dhe krahasuar me një vit më parë.
Sipas Bankës së Shqipërisë 37% e familjeve kanë marrë borxhe , burime joformale apo persona fizikë. Qëllimet kryesore të huamarrjes mbeten për konsum në 32% të rasteve të marrjes së një huaje dhe 36% për blerje/riparim i një prone.
Rreth gjysma e e familjeve huamarrëse deklarojnë se nuk kanë përmirësim të gjendjes së tyre financiare ndërsa pjesa tjetër e përgjigjeve tregon për përkeqësim të aftësisë së tyre paguese, në krahasim me një vit më parë, ç’ka mund të jetë reflektim i përkeqësimit të parametrave ekonomikë në vend për shkak të pandemisë së Covid-19.
Edhe në 6 mujorin e dytë familjet shqiptare nuk presin përmirësim të gjendjes së tyre ekonomike madje pritshmëritë janë që të marrin edhe më shumë hua për të përballuar shpenzimet e përditshme.
