Kreu demokrat Sali Berisha ka mbledhur sot figura të njohura të politikës, deputetë dhe mbështetës së tij për të festuar 33-vjetorin e themelimit të PD-së.
Në festën e organizuar nga PD e drejtuar nga Berisha nuk kanë munguar disa nga protagonistët apo firmëtarët e parë të themelimit të kësaj partie në dhjetorin e 1990-ës, si Arben Imami apo Neritan Ceka, pavarësisht përplasjeve që kanë pasur me ish-kryeministrin në vitet e para të pluralizmit shqiptar.
E gjithashtu në krah të Berishës u shfaq Besnik Mustafaj, një prej zërave kritikë ndaj tij, sikundër nuk kanë munguar deputetët aktualë të PD-së.
Mes të pranishmëve ishte Argita Malltezi, vajza e ish-Kryeministrit, e cila në Kuvendin Kombëtar të kësaj partie mbajti edhe një fjalim, duke ngritur hipotezën se mund të ishte ajo drejtuesja e ardhshme e demokratëve.
Gjithashtu festës së organizuar nga Berisha nuk i kanë munguar disa nga drejtuesit e partive aleate të PD-së, si Nard Ndoka apo Ekrem Spahia, dikur deputetë.
Arben Imami një prej themeluesve të PD-së, ndërsa ka marrë fjalën, tha se Partia Demokratike është kjo që është mbledhur këtu, pasi një parti nuk e bën vula, por njerëzit. Imami tha se këtu është shumica, ndërsa atje është një pakicë.
“Kjo nuk do të thotë se shumica ka gjithmonë të drejtë, pasi edhe në 2017 ajo shumica që mbështeti Lulzim Bashën nuk kishte të drejtë. Por pakica nuk mund ti imponohet shumicës. Nuk kam asgjë personale me Lulzim Bashën, por ai nuk është PD-ja, janë një pakicë”, tha Imami.
The post 33-vjet PD, ja figurat që shoqëruan Berishën në festë (FOTO) appeared first on 27.
