Tre vite pas anulimit të PPP-së për ndërtimin e aksit Thumanë-Kashar, qeveria shqiptare ka vendosur që ti japë kompanisë Gener 2 projektimin dhe ndërtimin e kësaj rruge.
Lajmin e ka bërë të ditur ministrja Belinda Balluku pas mbledhjes së Këshillit të Ministrave, ku tha se ky akt u anulua për shkak se ajo hapësirë fiskale iu kalua paktit për Universitetit dhe tashmë do të rikthehet.
“Dua të ndalem te dy VKM, dorëzimi i licensave minerare nga përfituesit, u amenduan disa nga rregullat për transformimin e këtyre lejeve, për shkak se kemi vënë re transferim dhe tregti kundër rregullave në fuqi. Duke qenë se ne e konsiderojmë këtë një sektor shumë të rëndësishëm, duam t’i rikthejmë atij parimet ligjore. Lind nevoja sot më shumë se kurrë që të ketë një vëmendje më të madhe nga ana e qeverisë, pas interesit të shfaqur dhe nga kompani ndërkombëtare. VKM e dytë është Thumanë Kashar, në 2019 kontrata e lidhur me PPP u anulua për shkak se ajo hapësirë fiskale iu kalua paktit për Universitetit. Ky akt tashmë do të rikthehet, ku qeveria nuk do të investojë, është bërë përmes një procesi negocimi, është një nga segmentet më të rëndësishme të korridorit blu”, tha Balluku.
