Nga Ylli Sula
Si sot, më datë 25 prill, plot 554 vjet më parë, ikona e Zojës së Këshillit të Mirë mbërrinte në Genazzano të Italisë e transportuar, sipas gojëdhanës, besimit a legjendës “nga duar engjëjsh”, të cilët e larguan nga kisha rrëzë kodrës së kalasë së Rozafës, ku ajo venerohej, për ta mbrojtur nga përdhosja që i kërcënohej prej dyndjes në afrim të “barbarëve”, më pak se 1 vit para vdekjes së Gjergj Kastriotit.
Si sot, më datë 25 prill 1993, shenjëtori Papa Gjon Pali II, përulej e puthte dheun e Shqipërisë e vizitën e parë do ta bënte pikërisht në kishën e Zojës… rrëzë kodrës së kalasë së Rozafës.
Një javë para vizitës në Shqipëri, papa Françesku lajmëronte se po vinte në vendin e shqipeve me “bekimin e Zojës së Këshillit të Mirë”. Në meshën që Ai mbajti në sheshin e shenjtores Nënë Tereza, pas shpinës qendronte varur një kopje e ikonës së Zojës së Shkodrës dhe fjalët përmbyllëse të meshës së Françeskut kujtonin e kumtonin:
“Po i drejtohemi tani Virgjëreshës Nënë, që e nderoni sidomos me titullin “Zoja e Këshillit të Mirë”. Nisem shpirtërisht për në Shenjtoren e saj në Shkodër, që e doni aq shumë, e ia besoj gjithë Kishën në Shqipëri e mbarë popullin shqiptar , në veçanti familjet, fëmijët e të moshuarit. Zoja ju priftë për të ecur së bashku me Zotin, drejt shpresës që nuk zhgënjen”.
Në Genazzano, në kishën e madhe të Zojës së Këshillit të Mirë, ku gjendet sotekësajdite ikona e Zojës së mërguar nga Shkodra, prej shekujsh, pas një rituali nëntë ditor, çdo 25 prill në mbrëmje festohet dita e Zojës, ndërsa në pjesën tjetër të botës, ku gjenden kisha të Zojës së Këshillit të Mirë e ndiqet riti i saj, dita e Zojës festohet më datë 26.
Po këtu, këtë 25 prill a do të dimë dot për pak çaste t’i vëmë veshin lutjeve të Zojës që vijnë nga përtej Adriatikut, bekimit të Shën Papa Gjon Palit II, porosive të Shën Terezës e kumteve të papa Françeskut? A do festojë qytetaria dhe shpresa apo barbaria dhe zhgënjimi këtë 25 prill në mbrëmje në Tiranë e nesër në gjithë Shqipërinë? Apo festën do vazhdojmë t’ia lemë vetëm Genazzano-s për mbërritjen e Zojës atje, ndërsa ne këtu 25 prillin do e shpallim ditë zie për largimin e saj prej këndej përfundimisht, edhe shpirtërisht?
