Kryetari i Partisë Demokratike Sali Berisha, ka kujtuar sot 23 vjetorin e hyrjes së forcave paqeruajtëse të NATO-s në Kosovë duke i dhënë fund gjenocidit serb.
Me anë të një postimi në rrjetin social Facebook, Berisha ka theksuar se kjo është një ditë mirënjohjeje për të gjithë ata që dhanë jetën për lirinë e Kosovës.
“23 vjetori i hyrjes së NATO-s në Kosovë! Të dashur miq, si sot 23 vjet më parë, pas tre muajsh bombardimesh të infrastrukturës ushtarake të Beogradit nga fuqitë ajrore të NATO-s, trupat tokësore të Aleances hynë si çlirimtare në Kosovë. Kjo është një ditë e shënuar historike për Kosovën, kombin shqiptar dhe NATO-n. Kjo është një ditë mirënjohjeje të pakufijshme për të gjithë ata që luftuan dhe dhanë jetën për lirinë e Kosovës, për Aleancën e Atlantikut të Veriut, ushtritë dhe vendet anëtare të saj, në veçanti për SHBA-të dhe presidentin Bill Klinton që udhëhoqën betejën e NATO-s për çlirimin e Kosovës. Rroftë Kosova, rroftë NATO!”, ka shkruar kreu i PD-së.
