Tre drejtues policie u shkarkuan dhe 4 efektivë janë në proces disiplinor pas zbulimit të 11 ton e gjysmë kanabis, që u gjet një ditë më parë në ish-depot e fshatit Pagri. Kryeplaku i fshatit dhe dy administratorët e ish-depove u arrestuan, ndërsa një i tretë është shpallur në kërkim.
Gent Mullai, zëdhënës i Policisë së Shtetit, doli para mediave për të bërë publikë emrat e zyrtarëve ndaj të cilëve u morën masa.
“Inspektor Pëllumb Çabo, me detyrë ndihmës-specialist SPZ u përjashtua nga Policia e Shtetit; komisar Kastriot Ndoi, me detyrë shef seksioni për krimet në Komisariatin e Policisë Përmet, për shkelje të rënda të rregullores, u shkarkua nga detyra; kryekomisar Ermir Gëxhani, me detyrë shef i Komisariatit të Policisë Përmet, për shkelje të rënda të rregullores u shkarkua nga detyra; komisar Asim Beqiraj, me detyrë shef i seksionit të sigurisë publike në Komisariatin e Policisë Përmet, për shkak të shkeljes së rregullores, ka nisur procedimi disiplinor ndaj tij; komisar Gentian Shehu, me detyrë shef i seksionit për hetimin e narkotikëve në drejtorinë vendore të Policisë Gjirokastër, për shkelje të rregullores ka nisur hetimi disiplinor; kryekomisar Agim Fejzo, me detyrë shef i sektorit për hetimin e trafikut të narkotikëve, në drejtorinë e Policisë Gjirokastër, për shkelje të rregullores ka nisur hetimi disiplinor; drejtues Fatmir Hoxha, me detyrë zv/drejtor për hetimin e krimeve dhe sigurinë publike në drejtorinë vendore të Policisë Gjirokastër, nisi procedimi disiplinor; drejtuesi i parë Arianit Arapi, me detyrë drejtor në drejtorinë vendore të Policisë Gjirokastër, për shkelje të rregullores, nisi procedimi disiplinor”- tha zëdhënësi i Policisë së Shtetit.
