Sot bëhen 10 vjet nga vdekja e ushtarit Feti Vogli në Afganistan, ku ai kishte shkuar për shërbim, si pjesë e grupit që Shqipëria dërgoi atje. Ditën e sotme kolegu i të ndjerit, ish- ushtari Aleksandër Peçi ka rrëfyer më shumë detaje nga ngjarja e tmerrshme.
Ai ka treguar gjatë një interviste televizive sesi ndodhi ngjarja ku mbeti i vrarë Vogli dhe vetë, Peçi i cili ishte i pranishëm në atë aksion, mbeti i plagosur në trup dhe në fytyrë. Ai ka thënë se ishin në fshatra të thellë dhe në atë momente u gjetën të papërgatitur, për shkak se ushtarë të infiltruar nga talebanët i qëlluan nga pas.
“Gjatë rrugës në një nga fshatrat e thellë të Afganistanit, kemi ndaluar në një spital në një qendër shëndetësore dhe po bëhej rihapja e saj pasi ishte bërë restaurimi pasi u rimor nga talebanët.
Më tej kishte tepër probleme, shkretëtire, ngecje makinash, ishte një ditë e zymtë. Pasi arritëm në fshat ne kishim për detyrë si forcë speciale të shoqëronim dhe të ruanim zonjën amerikane që kishte ardhur për të parë restaurimin e një shkolle.
Unë dhe kapiten Feti Vogli ishim jashtë duke bërë perimetrin e sigurisë. Pas nesh ishin policët afgane. Në atë moment morëm plagët e para nga policët pas shpinës tonë. Kapiteni Feti Vogli mori plagën vdekjeprurëse në qafë ndërsa ne morëm plagë në trup. Pas dëshmisë së dhënë nga ai agresor doli që ishte një polic i infiltruar nga talebanët në rradhët e policisë afgane.
Ishim të papërgatitur sepse ishte hera e parë që ndodhte që policia afgane të sulmonte forcat e NATO-s. Unë në atë ngjarje kam marrë 4 plagë në trup dhe 1 në fytyrë. Më është dashur të qëndroja një vit në spital që të rikuperohesha në Gjermani. Pastaj edhe në Shqipëri kam bërë terapi dhe më pas një ndërhyrje në Turqi”, tregoi ai.
Sakaq, kujtojmë se presidenti i vendit llir Meta ka përkujtuar sot 10 vjetorin e vdekjes së Feti Voglit, duke e konsideruar si një nga heronjtë më guximtar që dha jetën për të sjellë paqe.
