Salla e kinemasë së Akademisë së Filmit dhe Multimedias Marubi sherbeu dje si pikëtakim mes miqve e kolegëve të shkrimtarit dhe skenaristit Vath Koreshi, të cilët e kujtuan ate në 10 vjetorin e ndarjes nga jeta. Regjisori Kujtim Çashku e kujtoi Koreshin duke thene se “ky njeri, i cili në një farë mënyre edhe duke qenë hera-herës i veshur me pushtet, nuk u gllabërua asnjëherë nga pushteti. Vath Koreshi ishte njeri që qytetarinë e lartë që kishte nuk mund ta identifikonte në funksion të një pushteti. Mendoj se ky zë bën thirrje të fuqishme në momentet aktuale, sepse është shndërruar një fenomen i tillë që duhet patjetër të vishesh me pushtet për të arritur qëllimet e tua” .
Regjisori Pirro Milkani solli ndëmend bashkëpunimet në kinema me Koreshin. “Me Vathin kam realizuar tre filma. Por do ndalem te një, te filmi “Në kufi të dy legjendave”; film që flet për dy legjenda, një të vjetër dhe një moderne. E vjetra rrëfen sesi ajo shtriga bobozare përmbyste Myzeqenë dhe modernia sesi njerëzit duan ta thajnë dhe shfrytëzojnë. Në këta dhjetë vjet që Vathi na mungon Shqipëria është përmbytur disa herë dhe them: “Ah mor Vath të ishe gjallë të shihje sesi Shqipëria e shkretë vazhdon të përmbytet nga shtriga bobozare!”. Kështu që për ta mbyllur nëse kinematografia arriti ato nivele të artit është sepse brumin, skenarin e merrte nga mjeshtër të fjalës e letërsisë siç ishin Vath Koreshi, Kiço Blushi, Natasha Lako, Ismail Kadare, Dritëro Agollit, etj., etj. Dhe me anë të tyre ne patëm mundësi të realizojmë ata filma që sot e kësaj dite shoqëria shqiptare i sheh me ëndje”.
