I bronxtë, teksa ndoshta këndon “Hapma portën o”, këtë pranverë Françesk Radi është përjetësuar në vendin që deshi më shumë në Tiranë.
I ulur në stol, me kitarë në duar… tashmë zëri e notat e Radit do të përhapen me çdo cicërimë zogu në brigjet e liqenit artificial.
3 prilli, 1 vjetori i ndarjes nga jeta të artistit shqiptar do të kulmojë me shfaqjen e një dokumentari për të…”Jetë e trazuar”, shfaqet në orën 17:00 në Kinema Millenium.
“Një vit lamtumire Franko!”. Miq dhe pasionantë të muzikës së Françesk Radit do të bëhen bashkë në 1 vjetorin e ndarjes së tij nga jeta, për ta kujtuar në vendin që ai deshi më shumë në këtë qytet, amfiteatrin tek Liqeni Artificial. Më 3 prill ora 9 e mëngjesit pranë amfiteatrit tek Liqeni Artificial, atje ku me kitarën e pandashme krijoi meloditë e para, këngëtari do të kujtohet përmes muzikës dhe një monumenti kushtuar figurës së tij. “Ju presim ta vendosim sërish Frankon mes nesh ashtu si dikur. Më pas në orën 17.00 ne ambientet e kinema Millenium do të transmetohet dokumentari “ Jetë e trazuar “ për të ndjekur rrugëtimin e një ëndrre që edhe pse e prerë tingëllojë gjatë. Kush e njohu Frankon e deshi, kush e deshi qau, e kush qau nuk i tha dot lamtumire, por thjesht mirupafshim Mik. Askush nuk vdes në këtë jetë kur jeton në zemër e melodi”, shkruan bashkëshortja e tij, Tefta Radi.
