Gjykata turke ka lënë në arrest me burg tre shqiptarët, të cilët u arrestuan pak ditë më parë në Turqi, teksa transportonin 1.5 tonë drogë në zonën e Mugalas. Të arrestuarit kanë mohuar përfshirjen e tyre duke thënë se nuk njihnin as shitësin dhe as blerësin ndërsa sa i përket transportit të lëndës narkotike kanë deklaruar se vetëm u është thënë se do të transportonin disa thasë.
Ndërsa më herët, sipas raporteve të publikuara, trafikantët shqitarë kishin ndryshuar mënyrën e trafikimit të drogës, duke e çuar këtë herë nga territori turk ku edhe ranë në prangat e policisë.
1.5 ton kanabis nga Shqipëria u gjetën të fshehura në një pyll, në zonën e Muglas nga Policia turke. Operacioni i koduar “Operacioni i nderit”, ka nisur pas marrjes së informacioneve se një sasi e madhe droge po vinte nga Shqipëria. Sipas zëvendësministrit të Brendshëm turk, gjithçka nisi pasi një anije peshkimi pa flamur u zbulua në ujërat ndërkombëtare dhe lëvizjet e saj të dyshimta u monitoruan menjëherë. Ndërsa në pamjet e publikuara nga operacioni, duket droga e paketuar në disa qese të mëdha të zeza, ndërkohë që bashkë me drogën, Policia ka sekuestruar edhe 3 pistoleta.
