Dy bashkëpunëtorët e kamerunasit Josoua Ngankam i cili dy ditë më parë u kap me 1.2 milionë euro false në aeroportin e Rinasit, janë lënë në “arrest me burg”.
Jeniffer Chollet nga Zvicra dhe Zinedine Nkeh nga Kameruni bashkëpunuan duke i fshehur paratë me peshqir brenda valixhes. Gjatë seancës së sotme, Zinedine Nkeh tha se kishte ardhur në Shqipëri për turizëm, ndërsa gruaja pretendon se nuk ka asnjë dijeni lidhur me akuzat e ngritura ndaj saj.
“Kam ardhur në Shqipëri prej një viti e gjysmë përmes një agjencie zhvillimi biznesesh. Nuk kam asnjë lidhje me paratë false, pavarësisht se dal në përgjime duke komunikuar me njërin prej kamerunasve. Unë jam takuar me të në Tiranë tek Plaza, ndërsa komunikimi me ta ka qenë në kuadër të bashkëpunimit për sjellje të investitorëve në Shqipëri. Nuk kisha dhe nuk kam asnjë dijeni për paratë,”- tha ajo në fjalën e saj. Por ende nuk dihet se për kë vinin paratë në Shqipëri.
Zinedine Nkeh, 45 vjeç, ka qenë dy herë në Shqipëri dhe luante rolin e korrierit. Pas ndalimit nga policia, kamerunasi tha se është nisur nga Franca me transit Stambollin drejt Tiranës dhe në aeroport do ta priste një bashkëkombës i tij, të cilin e ka identifikuar me emrin Toni. Toni i ka dhënë valixhen në Francë dhe i ka thënë se kur të mbërrinte në Rinas duhet ta priste në një kafe brenda aeroportit.
