Sekretari i Përgjithshëm i Partisë së Lirisë ka reaguar pas kërkesës së Çekisë për rikthimin e vizave me Shqipërinë. Blushi shprehet se ky është një lajm i rëndë dhe se keqqeverisja e Edi Ramës po vë në rrezik lëvizjen e lirë të qytetarëve. Më tej ai shkruan në reagimin e tij në Facebook se çdo ditë e Edi Ramës në pushtet do të ketë pasoja kërcënuese për lirinë, të drejtat dhe lëvizjen e qytetarëve.
Reagimi i Tedi Blushit:
Kërkesa e Çekisë, që mban Presidencën e Bashkimit Europian, për rikthimin e regjimit të vizave me Shqipërinë është një lajm shumë i rëndë.
Shkaku i vetëm është keqqeverisja e Edi Ramës, që po vë seriozisht në rrezik lëvizjen e lirë të qytetarëve, këtë arritje me rëndësi të jashtëzakonshme, që nuk është realizuar nga “Rilindja”, por që po vihet në diskutim pas 10 vitesh të saj në pushtet.
Shqiptarët nuk e meritojnë të rikthehen në kohën kur dëshpërimisht qëndronin para dyerve të ambasadave në pritje të vizave, për faj të Edi Ramës, hajdutërisë dhe inkriminimit të oborrit të tij në Qeveri.
Çdo ditë e Edi Ramës në pushtet do të ketë pasoja kërcënuese për lirinë, të drejtat dhe lëvizjen e qytetarëve.
Shporrja e tij është një mision patriotik!
