Ka than' i moçmi: 

"Shqiptarët tregojnë çka s'duhet, e fshehin atë çka e di e tërë bota."

- At Gjergj Fishta   

Situata e përmbytjeve/ Ministria e Brendshme: Të mbyllen shkollat

Nga 27.al 0

1

Ministria e Punëve të Brendshme këshillon gjithë qytetarët e zonave të prekura nga reshjet e dendura të evitojnë në maksimum lëvizjet ditën e sotme.

Gjithashtu Ministria e Punëve të Brendshme ka kërkuar pezullimin e mësimit në shkolla, në këto zona.

Foto LSA/ Elton Buhuri
Foto LSA/ Elton Buhuri

Pas situatës së krijuar për shkak të reshjeve, me urdhër të ministrit të Punëve të Brendshme pranë çdo prefekture janë mbledhur Shtabet e Emergjencave, të cilat po ndjekin gjendjen nga afër.

Situata paraqitet si më poshtë për çdo qark:

Qarku Tiranë

Reshjet  kanë krijuar problematikë në autostradën Tiranë-Durrës, nënkalimin e Vorës dhe në nënkalimet te Kthesa e Kasharit, ku ujërat kanë arritur nivelin rreth gjysëm metri dhe kanë bllokuar rrugën. Forcat zjarrfikëse kanë shkuar në vendngjarje për normalizimin e situatës. Policia rrugore ka bllokuar këtë pjesë të autostradës dhe lëvizja e automjeteve për në Durrës bëhet nga rruga Tiranë-Ndroq.

Qarku Dibër

Foto LSA/ Gent Shkullaku
Foto LSA/ Gent Shkullaku

Gjatë 24 orëve ka pasur reshje shiu me intensitet, të cilat kanë krijuar problematikë në fshatin Urakë, njësia administrative Rukaj, Bashkia Mat, ku ujërat e lumit Drin i Zi kanë dalë nga shtrati duke rrezikuar 10 banesa, familjet e të cilave janë evakuar. Në fshatin Urakë, Mat si pasojë e rritjes së nivelit të lumit, ka marrë me vete urën (e telit) e këtij fshati. Nga ura e Matit deri në Suç, si pasojë e reshjeve të dendura të shiut është bllokuar rruga nacionale, 3 mjete po punojnë për hapjen e rrugës. Fshati Muzhaç, Mat si pasojë e daljes nga shtrati i përroit të këtij fshati 15 familje rrezikohen të përmbyten. Në fshatin Batër e Madhe të njësisë administrative Komsi janë evakuuar 15 familje. Në qytetin Burrel 4 banesa dhe 3 biznese kanë prani uji.

Qarku Durrës

Si pasojë e reshjeve me intensitet të lartë në disa lagje të qytetit ka pasur prezencë uji në katet e para të disa banesave kryesisht në lagjen nr.18 dhe nr.4. Punonjësit e ndërmarrjeve të bashkisë dhe Shërbimi Zjarrfikës po punojnë me motopompa për të bërë të mundur tërheqjen e ujit dhe kthimin në normalitet të situatës.

Lumi Zezë ka dalë nga shtrati dhe kishte izoluar 3 familje, banuese në Njësinë Administrative Fushë-Krujë, të cilat janë evakuuar nga Forcat Zjarrfikëse të Krujës. Nga Batalioni i Mbështetjes Rajonale të Forcave të Armatosura janë dërguar në Fushë-Krujë dy ekipe shpëtimi me varka për të ndihmuar familjet në nevojë.

Foto LSA/ Elton Buhuri
Foto LSA/ Elton Buhuri

Qarku Kukës

Akset Bajram Curri-Valbonë dhe Dushaj-Lekbibaj janë ribllokuar si pasojë e rrëshkitjeve të dherave dhe gurëve. Firmat kontraktore po punojnë për hapjen e tyre Të gjitha akset kombëtare janë nën trysninë e rënies së gurëve, të dherave dhe vërshimin e ujërave.

Probleme ka në rrugët që lidhin njësitë administrative Grykë-Çajë, Malzi, Lekbibaj, Fierzë, Bujan, Tropojë. Sipas informacionit të marrë janë shembur  urat që lidhin fshatrat Viçidol, Tropojë e Vjetër, Lekbibaj, Geghysen, T’pla të rrethit të Tropojës, Bashkia Tropojë.

Në Bajram Curri si pasojë e vërshimit të ujërave dhe rrëshkitjes së dherave janë dëmtuar rreth 15 shtëpi në lagjen Partizani, 2 shtëpi në fshatin Dojan dhe 2 shtëpi në fshati Bujan.

Si pasojë e reshjeve kemi përmbytje të tokave bujqësore në T’plan, Viçdol, Tropojë.

Për shkak të motit të keq në Qarkun e Kukësit ka patur mungesë të energjisë elektrike. Pa energji elektrike janë rrethet Kukës, njësitë administrative: Kolsh, Surroj, Arrën, Malzi, Grykë Cajë, Bushtricë, Kalisë. Rrethi Has, njësitë administrative: Fajza, Golaj, Gjinaj, Krumë fshati Cahan.Rrethi Tropojë, Njësia Administrative Bytyç.

Qarku Lezhë

Në rrethin e Kurbinit rruga rurale që lidh fshatin Gallatë dhe Vinjoll është e bllokuar, pasi ka rrëshqitje masive dherash. Në fshatin Zheje dhe Gjormë ka prani uji në afërsi të 10 banesave dhe sipërfaqe toke të mbuluara nga uji në lartësi deri në 30 centimetra. Në Rrethin e Mirditës në fshatin Tarazh, lumi Zalli Zmesë, ka dal nga shtrati, dhe ka përmbytur disa toka bujqësore. Në njësinë administrative Orosh janë të pa kalueshme rrugët rurale të fshatrave Grykorosh dhe Spaç.

Në disa fshatra në Bashkinë Mirditë nuk ka energji elektrike.

Nga qarqet e tjera të vendit nuk raportohen situata emergjente të krijuara nga kushtet e motit.

Lini një koment

Adresa juaj e Email-it nuk do të bëhet publike

Mund të përdorni HTML tags dhe atributet: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>