Ka than' i moçmi: 

"Shqiptarët tregojnë çka s'duhet, e fshehin atë çka e di e tërë bota."

- At Gjergj Fishta   

Përshkallëzohet tensioni Tiranë-Athinë, Greqia dërgon tanket në kufirin me Shqipërinë (VIDEO)

Nga Skenderi 0

Përshkallëzohet tensioni Tiranë-Athinë. Prej datës 7 nëntor, Greqia ka dislokuar në kufirin me Shqipërinë tanket dhe mjetet e saj të rënda më moderne luftarake në kuadrin e një stërvitjeje të koduar “Mburojë çeliku”. balkanweb.com ka mundur të sigurojë ekskluzivisht një video të përgatitur nga ushtria greke, e cila vetëm pak ditë më parë i është shpërndarë mediave të vendit fqinj ku dëgjohen qartësisht urdhrat për goditjen e “objektivave”.

Mësohet se bëhet fjalë pikërisht për stërvitjen e Brigadës së Tetë Sulmuese të ushtrisë greke, në përbërje të së cilës janë efektivët më elitarë të këmbësorisë. Për këtë stërvitje ushtarake bie në sy fakti që gati në të gjitha mediat greke, është publikuar pothuajse i njëjti tekst njoftimi, i cili ndonëse nuk përmend në asnjë rresht Shqipërinë, nënkupton qartë një paralajmërim serioz që Athina zyrtare ka vendosur t’i bëjë Tiranës.

Video na kujton se në çdo drejtim ushtria jonë është e pranishme në të gjithë territorin e Greqisë. Edhe aty, ku nuk ka asnjë problem të madh ushtarak, sepse nuk ka asnjë armik, por ka shumë udhëheqje sfiduese dhe miq të afërt me Ankaranë. Greqia nuk ka nevojë për të bërë një përballje ushtarake me asnjë. Por, ata që e interpretojnë durimin e Greqisë si një dobësi, është e këshillueshme që të “pushojnë” retorikën e tyre kundër Greqisë”, – citohet njoftimi zyrtar i ushtrisë greke në mediat e vendit fqinj.

mediat-greke

Paralajmërimi

Rreth një muaj më parë ishte kreu i diplomacisë greke, Niko Kotzias që paralajmëroi Shqipërinë të tregojë kujdes me Çështjen Çame, duke i kujtuar asaj se nuk mund ta nënvlerësojë Greqinë, për shkak të krizës që ajo po kalon. Deklaratat e drejtpërdrejta të ministrit të jashtëm të Greqisë u bënë në një intervistë në median greke, ku ndër të tjera Kotzias nuk harroi të përmendë epërsinë ushtarake të Greqisë, ndonëse me Shqipërinë është aleate në NATO.

Greqia ia kalon në të gjitha drejtimet. Ka dhjetëfishin e GDP-së, sisteme të shumëfishta mbrojtjeje dhe sigurie, shumëfish forcë ekonomike. Ata janë të varur sa i përket ekonomisë, remitancave të emigrantëve, investimeve, tregtisë. Kemi edhe përfaqësim asimetrik në arenën ndërkombëtare. Ndaj është mirë që të bashkëpunojnë, të bëhen realistë dhe të ndihmojnë në krijimin e marrëdhënieve të përfitimit të përbashkët. Të zgjidhim çështjet e hapura bazuar në të drejtën ndërkombëtare dhe traditën europiane”, – paralajmëroi Koztias.

Pikërisht, këto deklarata i paraprinë edhe stërvitjes së Brigadës së Tetë të Këmbësorisë që Greqia sapo ka nisur në kufirin me Shqipërinë, duke i dëshmuar edhe nga afër epërsinë ushtarake.

Emigrantët

Kujtojmë se pak ditë më parë në pikën kufitare të Kakavijës, pala greke ka kthyer mbi 100 shqiptarë, mes tyre gra, fëmijë e të moshuar. Argumenti i përdorur ka qenë mungesa e dokumentave dhe fakti i mosdisponimit të një shume prej e pakta 100 euro në ditë për të hyrë në zonën Shengen. balkanweb.com ka siguruar edhe një foto të pasaportës së një shqiptari, ku bie në sy “damkosja” e saj me dy kryqe nga pala greke.

Në prononcime për News24, qytetarët shqiptarë të kthyer në kufi janë shprehur të irrituar për këtë qëndrim të palës greke.

Jemi kthyer pa arsye, dokumentat i kemi të rregullta, nuk po marrim vesh asgjë. Na kthyen pa shpjegime duke na vendosur dhe nga dy kryqe në pasaportë”, – janë shprehur ata. Në fakt kthimi i shqiptarëve në kufi nga pala greke nuk është një fenomen i rrallë. Kujtojmë se më herët argumenti “klasik” që përdorte pala greke ka qenë prishja e kompjuterave që ka fiksuar në kujtesë rradhët kilometrike të emigrantëve shqiptarë që prisnin me orë të të tëra për të kaluar në tokën helene.

Rikthimi i “fshesës” greke dhe “provokimet” e saj me stërvitjet ushtarake në kufi duken se vijnë si një formë “paralajmërimi” serioz të Athinës zyrtare ndaj deklaratave të forta dhe qëndrimeve të prera të kryeministrit, Edi Rama për Çështjen Çame, Himarën dhe anullimin e Ligjit të Luftës.

/balkanweb.com/

Lini një koment

Adresa juaj e Email-it nuk do të bëhet publike

Mund të përdorni HTML tags dhe atributet: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>